Bronsealderfoten
Er dette tidløysa
eller berre ein
liten flik
av den store forteljinga ?
Bronsealderfoten
avtrykket så mykje mindre
enn min eigen fot
varleg skrapt ut av gråstein
ikkje tilfeldig
ikkje utan ferdigheit
og heller ikkje utan tru
ei stor tru på varmen
frå den glødande solkula
som på midtsommardagen
den lengste dagen
varleg let flammehavet gli ned
bak horisonten
sløkt i bølgjene
i von om ei ny oppstode
eit nytt liv
neste morgen neste år
den vesle foten
som ber den store trua
peikar rett på augneblinken
der sol og hav vert foreina
og gjentek seg
inntil tida tek slutt
blir ein del av
mi vesle forteljing
der eg denne tidlege vårdagen
sveipt i nordvest og solforgylt
let foten trø ut av tida
kvilande i tidløysa.
Helleristningane på Penne mai 2010
Ingen kommentarer:
Legg inn en kommentar